L’inquisidor asturianu: Fernando Valdés y Salas

Quiciabes la so figura ande un pocu escaecida ultimamente, pero lo cierto ye que Fernando de Valdés y Salas (Salas, 1483 – Madrid, 1568) foi un de los políticos más influyentes na dómina que vivió.

Esti salín foi’l cabezaleru de la fundación de la Universidá d’Uviéu, y asina queda demostrao cola gran estatua que domina’l claustru vieyu de la Universidá. Magar del so calter como promotor de la mesma, lo cierto ye que, anque siguiendo les sos indicaciones, la obra nun foi executada hasta cuatro décades dempués de la so muerte.

Amás d’esta contribución a la sociedá asturiana, cuéntense por varios los edificios hestóricos qu’igualmente contruyeronse nel entornu de la so vida. Así, nel propiu Salas atopamos el Palaciu de Valdés Salas, un edificiu del sieglo XVI que sigue sobresaliendo na villa. Anguaño continúa siendo un edificiu de referencia, declaráu Bien d’Interés Turísticu, y qu’agospia dientro d’él un hotel, la Oficina de Turismu (qu’ufierta visites guiaes per distintos monumentos) y la Casa de Cultura del conceyu.

Pa más alcontramos tamién na villa la Colexata Santa María La Mayor, construyida pa da-y honores, y onde s’asitien les sos restos. Con un sepulcru como la parte más destacada, llevanta la familia una serie de capielles alredor hasta conformar un templu.

 

Perteneciendo al cuerpu eclesíasticu de los dominicos, Fernando de Valdés y Salas reconozse fuera de les nueses llendes por ser ún de los más ríxidos inquisidores de la Corona Castellana. Ente’l añu 1547 y el 1566 tomó midíes drástiques contra los moriscos y los conversos, amás d’imponer un dura censura contra los erasmistas.

La so obra Índices de libros prohibidos (1559) sigue siendo un bon exemplu de la censura impuesta pola Inquisición a lo llargo de los sieglos.