Puntu de referencia p’asturianos y turistes, la plaza Les Campes convirtióse col pasu los años nuna visita imprescindible si vas pasar unos díes nel conceyu Siero o si t’averes a esta villa de pasu. Nel sitiu onde agora podemos contemplar la escultura de Tino Rozada (Danza Prima), había una capiella dedicada a la Virxe del Carme, onde a finales del sieglu XVII celebren les primeres fiestes del Carme. La fiesta celebrábase’l domingu siguiente al 16 de xunetu o día del Carme.

Según cunten, les fiestes del Carme yeren bien populares, atrayíen numberosu públicu de la contorna y de fuera, de manera que los forasteros, aprovechaben p’asistir al mercáu del martes y quedar en La Pola tamién el llunes. D’esta miente, la fiesta siguía y pasó a celebrase’l llunes tantu o más que’l domingu, perdurando esta costume hasta los nuesos díes.

El llunes de Carmín foi declarada Fiesta d’Interés Turísticu Rexonal en 2002. Nella una camisa blanca y una pañoleta azul componen la indumentaria tradicional p’allegar al prau de la fiesta.

La plaza Les Campes en 1915.
La plaza Les Campes en 1915.

Nesta plaza podíen atopase tou tipu de talleres d’artesanos: madreñeros, boteros, ferreros, guarnicioneros, etc, yera onde tradicionalmente se celebraba’l mercáu selmanal de los martes, y el mercáu de ganáu. Anguaño ye unu de los llugares emblemáticos de La Pola Siero, yá que nella podemos almirar entá dellos exemplos d’arquitectura popular.

La Plaza de Les Campes ye llugar d’alcuentru y tamién de celebración. Exemplu d’ello ye la tradición que se sigue la nueche de San Xuan, al calor de la foguera, cuando los mozos solteros del pueblu baxen del monte cargaos col álamu más altu qu’atopen, pa llantalu na plaza y acompañalu con dalgún cantar escontra los homes casaos. Estos van dar el retruque’l día de San Pedru, llantando na mesma plaza un carbayu, que había ser más altu que’l de los mozos, y al qu’acompañen con otru cantar enllenu de bon humor, en respuesta a la d’aquellos.

El cascu urbanu foi organizándose alredor del mercáu de ganáu, onde trescurría la vida comercial, que diba n’aumentu a midida que s’abríen nuevos caminos o s’ameyoraben les comunicaciones esistentes coles aldegues vecines. L’exe viariu más importante yera la carretera Uviéu-Villaviciosa, la que se dirixía a Ceis y la que xunía Xixón con Valdesoto. El mercáu foi medrando adulces y convirtióse nunu de los mercaos de ganáu vacuno más importantes d’Asturies.