Depués d’una catástrofe nuclear, la vida tantea’l camín, d’abrise pasu con apariencia de normalidá. ¿Qué queda del pasáu, qué-yos espera a les nueves xeneraciones? Lucy Kirkwood espeya los mieos y pruyimientos d’un triángulu de personaxes yá maduros, en Los Hijos, la obra que David Serrano afai, dirixe y llanza pa toa España dende’l Teatru Palacio Valdés esti xueves a les 20.15 hores.

Serrano arrodióse d’un tríu d’intérpretes d’auténticu luxu, sabiduría y dominiu de la escena n’Adriana Ozores, Susi Sánchez y Joaquín Climent. Sobro les tables, trés científicos, trés físicos yá xubilaos nel ocaso de les sos vides, ex trabayadores de la central nuclear del desastre, solombra que la apodera tou dende la devastación.

Tan solo queden les últimes entraes disponibles pa poder esfrutar d’esti nuevu estrenu nacional, a precios d’ente 12 y 22 euros, en función de la zona del teatru. Pueden adquirise nes canales habituales, nes taquilles de la Casa Municipal de Cultura, del Centru Niemeyer, y nes del teatru la mesma tarde de la representación, dende dos hores antes.

Tan solo queden les últimes entraes disponibles pa poder esfrutar d’esti nuevu estrenu nacional

A un pasu de la zona, el territoriu de seguridá desallugáu tres l’accidente, viven nuna cabana Hazel y Robin, casaos dende va décades, y caltienen el contactu cola so fía mayor, Lauren. Rimaes del contador Geiger, dacuando nun hai lluz, nin agua corriente, pero ellí siguen n’apariencia de normalidá, ellí ta’l so pasáu, y el futuru que los resta. Y ellí, 30 años dempués, apaez Rose, antigua compañera de trabayu de la pareya. Una visita que la tresmana tou, y va obliga-yos a cavilgar sobro l’impactu de les sos vides, de la so propia xeneración, nes xeneraciones vinientes.

David Serrano convirtió nuna tradición estrenar los sos montaxes n’Avilés. La postrera, en xineru nel Palaciu Valdés con Port Arthur, tamién con Joaquín Climent como protagonista. Pal director, Los Hijos reflexona sobro’l futuru que llega dende un pasáu que s’acaba. Dende’l pasáu de la relación afeutiva de trés amigos que trabayaron xuntos tola so carrera y sobro el futuru de los millones de persones anónimes d’una xeneración que se abrir pasu. Y ente’l pasáu d’unos y el futuru de los otros, el presente del planeta como venceyu ente toos ellos».

Serrano afai per primer vegada n’España un drama que s’estrenó en Londres y en Broadway, y que a la dramaturga Lucy Kirkwood, dexó-y llograr el premiu a la meyor obra del añu 2018 qu’otorga’l gremiu d’escritores de Gran Bretaña. «Resulta apolmonante comprobar que l’autora -resalta Serrano-, supiera reflexar con tan solo trenta y cinco años a unos personaxes con casi’l doble d’edá. Pero más apolmonante ye entá que sepa tratar una tema tan revesosa güei pal planeta, como ye’l de la enerxía nuclear, dende les más íntimes emociones del ser humanu».