La Tarrancha presenta’l so discu nuevu y celebra una folixa en Xixón pol so 15 aniversariu

El Grupu asturianu de ska y fusión La Tarrancha saca discu nuevu y preséntalu el viniente sábadu 22 d’avientu na Sala Acapulco, en Xixón.

Esti añu foi pa La Tarrancha un añu de celebración, cumplíense 15 años de que ñacieron y de la so primer grabación d’estudiu. Dempués de tar presentando dalgún de los temes nuevos mientres esta primavera y branu n’una xiruca col nome de “15 años Baillando con llokes”, llega’l momentu de presentar el discu al completu n’una fiesta conmemorativa con tol so públicu. El discu grabóse en Tutu Estudios cola produción de Sergio Rodriguez y Sergio Díaz Montes y va ver la lluz per primer vez la semana qu’entra .

Pa esti trabayu, cuntaron con un bon elencu de collaboradores como Daniel Alvarez, multi-instrumentista sobradamente conocíu nel panorama folk pola so participación en distintes bandes y un habitual collaborador de La Tarrancha y que participa en bona parte del discu. Tamién formaron parte d’él Nel Sanchez excomponente del grupu al curdión, la polefacética Sil Fernandez (Delagua) a la voz, el palentín Arturo Rodriguez, de Vallarna, cola dulzáina castellana, los gaiteros Illan Escalada, Dani Naredo y David Muñiz, y los coros de les pandereteres de Nun Tamos Toes.

A lo llargo d’estos años, La Tarrancha sacó a la cai cinco discos en solitariu y tien participao en distintos discos compartíos, recopilatorios o d’homenaxe a otros artistes, incluyéndose nellos temes inéditos o versiones. N’avientu de 2017 salía’l compilatoriu infantil “Bestiariu 3” nel que La Tarrancha participa cola tema inéditu “La Ballena”, que tamién ta dientro d’esti discu a manera de Bonus track.

Un total de trece cortes configuren esti “Baillando con llokes” nel que La Tarrancha vuelve al ataque con un nuevu discu de pura fusión, ensin fai-y ascos a nengún estilu musical, ensin mieu a purismos, nin a la necesidá de tener una etiqueta pa lo que se fai, y como nel so anterior discu, “Elefantes na cacía”, failo  con muncha más fuercia, distorsión y enerxía que nos sos primeros trabayos. Les influencies y los estilos que s’aprecien nel discu van dende’l funk y el swing al punk-rock y al rockanroll, dende la música asturiana a los aires balcánicos o castellanos, con toques de ragga, rap y el so siempre presente ska. Un discu bailladeru unes veces, duru y contundente otres y duce y melódicu n’otres. Puru Mecigayu Ska como ellos denominen a la so música. Lletres que falen de lo cotidiano, de la necesidá de recuperar l’allegría, de les inxusticies, de la necesidá de garrar conciencia, en definitiva d’eses pequeñes y grandes coses que nos afecten a toes.

El conciertu.

L’apertura de puertes va ser a la 22 hores y el conciertu va empezar a les 22:30 hores. Amás de “Baillando con llokes”, el públicu asistente tamién va poder baillar al son d’antigües temes de La Tarrancha y al son de delles collaboraciones de vieyos conocíos de la banda y del públicu asturianu. Tamién ta prevista una Folixa Tarranchera posterior al conciertu, pero entá nun se desveló’l llugar. El preciu de la entrada ye de 5 euros anticipao y 7 en taquilla. Les entraes antemanaes tán disponibles en distintos puntos del centru d’Asturies como la Sidrería Canteli en Xixón, el Chigre Ochobre y el CSA La Semiente en L’Entregu, El Llar La Llegra n’Uviéu, L’Abellugu en Mieres, Cá Nando en Urbiés, Tabierna Cuevano en Siero, El Cafetón n’Avilés o La Bodega y Floristería Vidaflor en Villaviciosa.

Como ye vezu en La Tarrancha, tola so obra ye publicada con llicencia semi-llibre Creative Comons y amás de publicar en formatu físicu de CD, comparten tola so obra al traviés d’internet como parte de la so filosofía. Nesti duru camín de l’autoproducción, en llugar de faer una campaña de micromecenalgu na que’l públicu fai un compra antemanada y la plataforma dende onde se fai lleva una comisión, lo que fixeron, foi una campaña col nome “Esto nun ye un putu crowdfunding, anque podía selo”. Asina naide paga d’antemano nin tien que dar el so datos bancarios, a cencielles, al traviés del corréu eléctricu o dende’l faceboock la xente acuta per adelantao dalgunos de los llotes ufiertaos con cuenta de que la banda pueda faese una idea de los gastos que pue tener cubiertos con eses ventes.