La Selmana de les Lletres va rindir homenaxe a la música asturiana de los postreros 40 años

Luis Núñez y los Folganzanes, Premiu al meyor cantar 2017

L’eventu va desenvolvese dende’l 26 d’abril hasta’l 9 de mayu con actividaes repartíes per tola xeografía

Esti añu celébrase la 40 edición de la Selmana de les Lletres Asturianes, que va dar protagonismu a la música asturiana de los últimos 40 años. La Conseyería d’Educación y Cultura considera que’l llabor de la xente de la música en favor de la normalización llingüística ye un fechu destacable que merez el reconocimientu institucional y popular.

Dende’l día 26 d’abril al 9 de mayu van desarrollase delles actividaes repartíes pela xeografía asturiana: talleres, esposiciones, homenaxes, presentaciones de llibros, llectures públiques, certámenes y concursos lliterarios, alcuentros escolares, entregues de premios, conciertos, representaciones teatrales, etc.

La Selmana entama’l vienres 26 d’abril, col actu inaugural, a les siete la mañana, na escuela de Llorgozana (Carreño), del Alba de les Lletres Asturianes. Esi mesmu día, a les 20 hores, nel Teatru Nuevu de La Felguera (Llangréu), va facese la gala del XI Premiu al Meyor Cantar.

A lo llargo de la XL Selmana, nos conceyos de Ribeseya, Siero, Uviéu, Corvera, Grau, Xixón, Avilés y Tapia, van dir desarrollándose les actividaes que componen el programa. Nel Día del Llibru Asturianu, el vienres 4 de mayu, les persones que merquen llibros o discos n’asturianu o gallego-asturianu van recibir de regalu un discu doble con una escoyeta de 40 cantares representativos de la hestoria de la música nestes llingües.

La Conseyería d’Educación y Cultura “quier festexar y facer un homenaxe ala música y a les lletres asturianes descentralizando la organización y desarrollu de los actos”, y pa ello van collaboraer con instituciones y entidaes como la Xunta Xeneral, l’Institutu Asturianu de la Muyer y Polítiques de Mocedá, la Fundación Aula de les Metáfores, Llaboral Ciudá de la Cultura y dellos Conceyos.

Tags: