La revista de Viaxast-Conocer Asturies dedica un númberu especial a la muyer

La revista Viaxast-Conocer Asturies va salir a les cais en papel la selmana viniente, pero yá pue consultase na so edición dixital. Esti númberu de la revista dedica una especial atención a la muyer, coincidiendo col Día Internacional de la Muyer.

El númberu ábrese col lema “Una mar de muyeres” ya inclúi dellos reportaxes centraos na hestoria de la muyer n’Asturies, como’l dedicáu a la muyer n’ámbitos llaborales como la mina, la fábrica de tabacos de Xixón y la ganadería. Otros artículos falen de les actividaes dedicaes a la muyer y el cine en Mieres nestes selmanes, el papel de La Gota Lleche en Xixón y una entrevista “Conocer Asturies con…” na que Berta Piñán fai les sos recomendaciones pa facer turismu n’Asturies.

La revista inclúi otros conteníos que van tresportanos a conocer deportes d’aventura, la receta de los frixuelos, recomendaciones pa ver miradorios y paseos per Llaviana, Somiedu, Xixón, Castrillón, Avilés, Piloña y otros llugares, asina como dellos reportaxes de cultura.

Esti númberu 6 abre una nueva dómina de la revista, con dellos cambios, el más importantre d’ellos, el que cinca al nome. Viaxast queda nun segundu planu, ganando protagonismu la marca Conocer Asturies, plataforma que ta nun procesu d’unificación de la so imaxe, pasando de cuntar con dos nomes estremaos Conocer Asturias/Conocer Asturies, pa les versiones en castellán y n’asturianu de la mesma, a usar la forma Conocer Asturies pa dambes, asitiándose agora dambes páxines en www.conocerasturies.com 

La revista distribúise per centros de turismu y cultura de tol país y sal a la cai de forma trimestral.