Una esposición que recrea distintos momentos de la hestoria del conceyu con figures de Playmobil.

L’amuesa podrá visitase hasta’l 22 de payares nel Centru Cultural de Morea.

Esti martes, 31 d’ochobre, inaugurose la esposición de Playmobil “El ayer en Aller”, na que se recreen acciones y construcciones de la hestoria del conceyu. La iniciativa foi creada por Casvali Servicios Integrales, cola collaboración del Conceyu d’Ayer, del Centro de Encuentros y Creatividad, de la Asociación Cultura y Sociedad y de la Sociedad Humanitarios de San Martín.

Nel actu tuvieron presentes l’Alcalde del Conceyu d’Ayer, David Moreno Bobela, y el Director Creativu de la esposición, Javier Grela, quien fixo una visita guiada que desveló tolos secretos de l’amuesa.

La esposición, que podrá visitase hasta’l día 22 de payares, ufierta’l visitante una mena distinta d’entender el pasáu del conceyu con figures Playmobil. Pa ello, recreáronse escenes de distintos momentos de la hestoria, col fin de favorecer la so conocencia.

Dalgunes de les figures espuestes nun esisten en Playmobil, polo que se crearon pa esta amuesa. Amás, col fin d’entretener a quien visite esta esposición, escondiéronse cinco clicks doraos que’l visitante va poder ayudar a atopar.

Trátase d’una amuesa qu’amesta xuguetes y creatividá pa favorecer la divulgación de la hestoria del conceyu. Asina, represéntense dende escenarios medievales como la Torre de Sotu, hasta pasaxes de la hestoria anteriores como la construcción de la Vía Carisa polos romanos. La precisión de les recreaciones ye tal, que de xuru va sosprender a quien s’avere al Centru Cultural pa visitar esta esposición.

 

Tags: