Nun se sabe dende cuando se fai esti esquisitu platu, pero teniendo en cuenta que, les fabes vinieron d’América, ye posible que fuere del sieglu XVI o XVII.

Pa consiguir una rica fabada al estilu tradicional namás fai falta tener la calidá de los ingredientes, que ye la que mos va marcar el resultáu final, ah, y tamién… muncha, muncha paciencia.

Ingredientes pa 6 persones

1/2 Kg. de fabes de la granxa

2 morcielles asturianes

1 punta de xamón serranu de 100 grs.

2 chorizos asturianos

100 grs. de tocín entevenáu

1 cachu de rabu o de pasta de gochu

1/2 vasu d’aceite

1 cebolla grande (125 grs.)

2 serugues d’ayu

1 cuyaradina de pimentón duce

1 fueya de lloréu

3 cuyaraes soperes d’aceite d’oliva virxe estra y sal.

Ellaboración:

Pónense les fabes a remueyu n’agua frío, unes trés hores. Dempués d’esti tiempu esmúcense. Métense nun cazu cubiertes con agua frío y pónense al fueu pa calecer. Cuando ruempen a ferver, entórnase’l cazu, tapándola con una tapa, y esmuzse l’agua. Aparte ye importante tener una pota con agua frío pa echales dientro.

Añadir entós: la cebolla pelada y cortada en cuatro; les serugues d’ayu, pelaes pero enteres; l’aceite; el rabu o pata. Añadir el pimentón y finalmente échense na pota los embutíos, primero los más duros: el xamón y el chorizu, y dempués los demás, menos les morcielles.

L’agua tien de cubrir lo xusto pa la fabada. Tápase la pota y déxase cocer a poco fueu de 2 a 3 hores (el tiempu depende de les fabes). Media hora enantes de rematar la cocción añadir les morcielles. Sálase cuasi a última hora y entós añádese’l mizcu d’azafrán bien machucao nel morteru y disuelto con un pocu de caldu de cocer la fabada.