La Conseyería d’Educación prorroga la esposición “Voces. La llingua n’Asturies al traviés de los sieglos”

La muestra va poder visitase nel Muséu Arqueolóxicu d’Asturies hasta’l 11 de payares


L’éxitu de públicu y l’interés de bien de centros educativos en visitar la esposición Voces. La llingua n’Asturies al traviés de los sieglos llevó a la Conseyería d’Educación y Cultura a ampliar el calendariu de la muestra, que finalmente va poder visitase nel Muséu Arqueolóxicu d’Asturies hasta’l domingu 11 de payares, inclusive.

La rellación del asturianu coles llingües indoeuropees y romániques, l’apaición de los primeros documentos nos que se menta l’asturianu como llingua oral tradicional y propia de la xente d’esti territoriu, los primeros documentos n’asturianu, el desenvolvimientu de la so lliteratura, la minorización o los movimientos sociales pa la so recuperación y revitalización tienen acoyida nos materiales d’esta esposición, onde s’otorgó gran importancia a los elementos gráficos y audiovisuales.

Na muestra pueden contemplase, amás, delles pieces lliteraries y arqueolóxiques singulares, cedíes por coleccionistes y pol mesmu Muséu Arqueolóxicu d’Asturies, qu’acuye la esposición.