CONOCER ASTURIES CON… INACIU IGLESIAS

Inaciu Iglesias ñació n’Uviéu en 1966. Ye empresariu, escritor y foi editor en llingua asturiana al frente d’Ámbitu y más tarde de Trabe, nesti momentu y tres ser conceyal cuatro años en Noreña, sigue col so llabor al frente Cartonajes VIR. Implicáu en numberoses asociaciones , como l’Asociación Asturiana d’Empresa Familiar, el Club Asturiano de Calidad o la Fundación Caveda y Nava. Apocayá presentó’l so llibru últimu «El país que queremos». Con él conocemos esta selmana más llugares y coses d’Asturies.

Un llugar pa perdese una fin de selmana…Llanes; y si nos ponemos más exóticos –o tampoco tanto- Londres gústame bien.

Un llugar pa vivir… Onde vivo: Valdesoto; nel centru’l paraísu.

Un platu… Lo crudo tien nun sé qué que me tira. Un chuletón nun tien comparanza. Y, polo mesmo, el sushi tamién me valdría. Soi mui agradecíu pa comer.

Un postre… De macedonia pueo comer cinco plataos.

Una sablera pa pasar el día… El Sablón; polo atopadiza que ye. Ye como una antoxana de la casa.

Un pueblín que nun podemos dexar de ver… Caliao ye de los sitios onde nun ye que se manden del asturianu ensin escondese; ye que son a correxite. Namás por eso, merez vese.

Un chigre pa tomar unos culinos… La terraza del Casa Telva, en Valdesoto, ye de les meyores d’Asturies.

Un parque natural pa visitar… Por dicir unu, Redes; qu’ehí foi onde me mordió una víbora y tovía toi equí pa contalo.

Una fiesta a la que nun faltar… Los Sidros y les comedies. Mui guapo.

Un muséu pa recomendar… Tengo-y un especial aquello al Arqueolóxicu, n’Uviéu. Ye una mirada xeneral a la nuestra hestoria que te da otra perspectiva de les coses.

Un momentu de la hestoria que te prestaría vivir… Tuvo que ser interesante cuando la nuestra Xunta Xeneral mandó embaxadores a Inglaterra pa consiguir el so apoyu escontra Napoleón.

Un baille pa pasalo bien… Unos valses d’esos tocaos con curdión son guapos: fáciles de baillar, tradicionales y elegantes. Y agarraos.

Una pallabra n’asturianu que te preste… Anque suene redundante, prestoso. Prestoso ye una palabra guapa.

Una tradición que nun pue perdese… Les que se viven con ilusión y non como recreación. Y pa eso –falando d’ilusión- cuento que la de los Reis Magos nun tien comparanza.

Una espresión n’asturianu que te preste… Como espresión, faime muncha gracia la de “ser quién”. “Ser quien” resuelve nuna voz l’eternu alderique de si lo de poder facer coses depende de les circunstancies o d’ún mesmu.