Empieza’l fríu y les sopes, los cocíos empiecen a facese un sitiu na nuesa mesa. Les llegumes nun pueden faltar na nuesa alimentación, yá que son una fonte fundamental de vitamines y minerales. Los garbanzos son ricos en fósforu, fierro y magnesiu y en vitamines B1 y B6. Güei traémosvos una receta pa esfrutar d’un platu de cuyar aptu pa tolos comensales: garbanzos con espinaques.

Ingredientes

  • 400g de garbanzos
  • 300g d’espinaques
  • 2 cenahories
  • 2 dientes d’ayu
  • 1 cuyaradina de pimentón duce
  • 1 cuyarada de tomate fritu
  • sal y pimienta
  • Aceite d’oliva

Paso a pasu

  • La nueche anterior, ponemos los garbanzos a remueyu. Cuando pasaren unes ocho hores, esmucimos y poner a cocer xuntu col pimentón, la cenahoria y l’ayu picáu.  Tamién podemos echa-y un chorrito d’aceite d’oliva. Van Precisar una media hora si los cocinamos nuna olla exprés; una hora y media o dos hores nuna olla normal.
  • Cuando los garbanzos tean cocinaos, añedimos una cuyarada de tomate fritu y les espinaques y dexamos cocer un par de minutos más, hasta que les espinaques amenorgaren.