Xixón axunta a los grandes del góspel

The Campbell Brothers, Golden Gate Quartet y The Mississippi Mass Choir son les tres formaciones que van actuar anguaño nel festival gijonés, del 13 al 15 d’avientu

0
4
Festival de Góspel de Xixón

El Teatru Xovellanos abre les sos puertes p’abellugar dellos conciertos esbillaos de dalgunos de los coros de góspel más renomados del mundu. Xixón enllénase asina de les voces carauterístiques d’esta música d’orixe relixosu, que surdió de les ilesies afroamericanes y que se conviertió dafechu nun espectáculu. La ciudá va vibrar asina un añu más a ritmu de góspel. Los díes 13, 14 y 15 d’avientu la capital del conceyu va empapase del ritmu y la fuercia de la música negra. Depués de más de 20 años na ciudá, el Festival de los Grandes del Góspel yá ye un clásicu de la Navidá xixonesa.

Xixoneses y visitantes van poder esfrutar anguaño de les actuaciones de:

THE CAMPBELL BROTHERS / DANCING IN THE CHURCH
Vienres 13 d’avientu, 20.30h. Butaca y entresuelu:25€ / Xeneral: 20€

The Campbell Brothers presenten “Sacred Steel”, música de góspel con guitarres de pedal y voces. Presenten un bayurosu material procedente del repertoriu de les ilesies pentecostales nuna nueva variante que presenta soníos, voces y ritmos enxamás sentíos fuera d’esi contestu.

GOLDEN GATE QUARTET / THE GOLDEN GOSPEL YEARS
Sábadu 14 d’avientu, 20.30h. Butaca y entresuelu:30€ / Xeneral: 25€

The Golden Gate Quartet son la lleenda dorada del góspel dende los años 30 del sieglu caberu, cuando Eddie Griffin, un barberu con una voz estraordinaria de tenor, decidió formar un cuartetu de góspel nel estilu jubilee, que yera lo más espardíu nes ilesies y nes barberíes de Virginia. El Golden Gate Quartet ta dirixíu anguaño pol barítonu Paul Brembly. 85 años depués de la so fundación, al Golden Gate Quartet siguen valiendo-y cuatro voces d’oru pa emocionanos como naide.

THE MISSISSIPPI MASS CHOIR / WHEN GOSPEL WAS GOSPEL
Domingu 15 d’avientu, 20.30h. Butaca y entresuelu:30€ / Xeneral: 25€.

The Mississippi Mass Choir fundóse en 1988 y yá lu votaron esi añu mesmu Coru del Añu y Meyor Nuevu Artista del Añu ne Conceyu Añal James Cleveland de New Orleans. El coru ganó dellos premios poles sos contribuciones a la música góspel, como’l Grammy al Meyor Coru de Góspel en 1997 y otros gallardones en delles categoríes de los premios Stellar, Soul Train o Dov. Realizó una montonera de xires per Estaos Xuníos, Europa, Xapón y América Llatina. Los sos 5 discos foron N 1 de la llista de música Góspel de Billboard. Nel 2000 entró nel Mississippi Hall of Fame.