Escosaes les entraes pal conciertu d’Amaral n’Avilés

Marisa Valle Roso tamién vende tol papel nel fin de xira de 'Consciente', recital nel que tará acompañada por Rodrigo Cuevas, Nando Agüeros y Eva Tejedor

0
4

Yá nun queden entraes pal conciertu d’Amaral n’Avilés. La taquilla del teatru Palacio Valdés escosó’l papel en menos de dos hores. La banda aragonesa va ufiertar el domingu 1 de marzu el que va ser el so conciertu más íntimu en tola so xira. Les entraes salieron a la venta a los diez de la mañana, y antes del mediudía yá se colgara’l cartelu de nun hai billetes, pa les alredor de 700 butaques que componen l’aforu del coliséu avilesín.

Amaral, Eva Amaral y Juan Aguirre, banda de referencia na música española, tan de xira col so últimu trabayu, Salto al color. El discu ye una somorguiada al océanu de colores sonoros onde conviven madera, metal, corazón y corteza, cuerpu, alma y allegría de vivir. La xira llevarálos por recintos como’l Wizink Center de Madrid, ante más de 15.000 espectadores.

Marisa Valle Roso

Marisa Valle Roso tamién escosó les entraes pal conciertu de fin de la so xira Consciente. Va ufiertar al públicu del Teatru Palacio Valdés una fiesta de la música asturiana. Va facelo acompañada por Rodrigo Cuevas, Nando Agüeros, Eva Tejedor, el so hermanu Fernando Valle Roso, Pandereteres d’Escontra’l Raigañu, Pandereteres de Fitoria y el Coru Mineru de Turón. Marisa Valle Roso combina versiones d’himnos de voces femenines inmortales, como Violeta Parra, Chavela Vargas o Mercedes Sosa, con temes que la devuelven a Asturies, como Planta 14 de Víctor Manuel, y composiciones propies. La tradición iberoamericana y asturiana fundar col presente, na voz única de la cantante asturiana.