El RIDEA celebra dos charres del so ciclu «Palabres d’Asturies, testigos de cultura»

El Real Institutu d’Estudios Asturianos (RIDEA), en collaboración col grupu d’investigación Seminariu de Filoloxía Asturiana, de la Universidá d’Uviéu, completa’l ciclu «Palabres d’Asturies, testigos de cultura» con dos conferencies centres nel léxicu d’Asturies. Zárrase asina’l ciclu qu’entamó l’añu 2018.

El martes 2 d’abril a les 19:30 hores van celebrar la primera d’elles, embaxo’l títulu «Léxico asturiano, toponimia y terminologías científicas-técnicas», va llevar la firma de Xulio Concepción Suárez. La segunda conferencia va impartila, Ramón d’Andrés, el martes 23 d’abril a la mesma hora, centrándose na influencia del euskera na xíriga de los teyeros y otres xírigues gremiales d’Asturies.

Esti ciclu céntrase nel estudiu del léxicu d’Asturies, entendiendo por tal el mesmu del asturianu o’l que forma parte del castellán faláu n’Asturies. Un campu d’estudiu bien cultiváu nel ámbitu académicu, qu’ufre suxerentes temes d’esposición y alderique. Nesta edición, el centru d’interés va asitiase en fenómenos que revelen la rellación ente la cultura popular y el léxicu: toponimia, dictadoloxía tópica y xírigues gremiales.

Dambes conferencies van impartise nel Salón d’Actos del RIDEA, asitiáu na Plaza Porlier d’Uviéu. La entrada ye llibre.

Tags: