El realizador mexicanu Alejandro Marcos rueda n’Uviéu’l so curtiu nuevu

El curtiumetraxe va rodase ente los díes 13 y 17 de xineru en La Zoreda y na estación de Llamaquique

0
7

El realizador mexicanu Alejandro Marcos atopa estos díes n’Asturies peracabando’l rodaxe del so nuevu proyectu The Aboves and The Bellows, un absorbente drama en redol a la desigualdá económica que se va rodar íntegramente n’Uviéu. El Hotel Castillo del Monte de La Zoreda en La Manxoya y la estación ferroviaria de Llamaquique van ser los escenarios del rodaxe. y que ta protagonizáu pola actriz italo-suiza Anima May (Kiss one or everyone), la española Alejandra Meco (Acacias 38, El secreto de Puente Viejo), el madrilanu Rodrigo H. Recio (Cuerpo de élite, Centro médico, Cuéntame cómo pasó) y la actriz polaca Daría Krauzco (Mar de plástico).

El curtiumetraxe, que se va rodar ente los díes 13 y 17 de xineru, ye una producción de Films Come True en collaboración estrecha cola asturiana Birmania Producciones. La mayor parte del equipu técnicu d’esti curtiumetraxe ye asturianu y la postproducción del filme va llevase a cabu de manera íntegra nel Principáu.

El 1% de los ricos del mundu atropa’l 60% de la riqueza mundial. The Aboves and the Belows ye un curtiumetraxe dramáticu sobro una muyer narcisista multimillonaria qu’atopa a una muyer honesta y trabayadora que vive debaxo de la so cama. Pero esta nun ye solo una hestoria sobro’l dineru: l’amor y tamién los celos, la envidia y la traición formen un cóctel esplosivu na trama d’esti proyectu qu’amuesa cómo l’avaricia puede envelenar l’amor verdadero.

El mexicanu Alejandro Marcos ye director de cine, guionista y fotógrafu aniciáu en Berlín, Alemaña. Dirixió dellos curtiumetraxes como Introspectif, protagonizáu por Benicio del Toru, Victoria Abril, Imanol Arias y Jorge Perugorría; Carne, con Lolita Flores, Luis Mottola, Rosa Vivas y Ángel de Miguel; La Doña, con Foína Canalda y Luis Mottola, ente otros.

Como guionista ye autor d’Uno, un drama apocalíptico sobre una devastadora nube solar, el thiller psicolóxicu Oma nel que una madre con síndrome de Munchausen vive una esperiencia sobrenatural mientres s’atopa n’estáu de coma, o Breaking news, una azogosa hestoria na qu’una famosa cantante ye acusada d’un crime que nun cometió.