El Principáu empecipia l’acondicionamientu de la escampada de la basílica Cuadonga

El proyectu cunta con una inversión de 433.277 euros

0
2
Basílica de Covadonga / Cuadonga

La Conseyería d’Infraestructures, Mediu Ambiente y Cambéu Climáticu empecipia esti llunes, cola instalación del centru de trabayu, les obres d’acondicionamientu de la escampada de la basílica de Cuadonga. Los trabayos suponen una inversión de 433.277 euros. Les actuaciones, con un plazu d’execución de trés meses, planiáronse teniendo en cuenta la meteoroloxía de la zona y l’arribación turística al santuariu. Asina, una tercer parte de les obres va executar no que resta d’añu, otra en primavera y la postrera n’ochobre de 2020, col fin d’interferir lo menos posible nel accesu al Real Sitiu.

Los trabayos consisten na reposición del pavimentu en mala traza dende la plaza de la basílica hasta l’entamu del accesu piatonal a la santa cueva, incluyendo la zona de rodadura, la vía sacra y los aparcamientos asitiaos frente a les cases de los canónigos. Nestes llabores utilizarán los mesmos materiales qu’esisten agora, sacante na zona de tremáu frente a les cases de los canónigos, que se va sustituyir por piedra caliar Griotte.