El Gobiernu d’Asturies arranca colos trámites pa declarar BIC a los Sidros de Valdesoto

El Conseyu de Patrimoniu aprobó la condición de BIC protección de la redolada de San Antolín de Bedón, la danza del Corri-Corri, Los Sidros y les Comedies de Valdesoto, y el santuariu de Bendueños.

L’organismu va incluyir nel inventariu la plaza d’abastos de Ribeseya, les ilesies de Proacina y Santa María de Noreña, el sistema hidráulicu de San Salvador de Corniana y dellos xacimientos arqueolóxicos.

El plenu da cuenta de dellos estudios previos pa intervenir en Santuyano, San Salvador de Valdediós y San Salvador de Priesca

El plenu del Conseyu del Patrimoniu Cultural d’Asturies alcordó güei empecipiar los trámites pa declarar bienes d’interés cultural (BIC) la ilesia de San Pedro d’Arroxu, en Quirós, y les termes romanes de Valdunu, en Les Regueres. Amás, analizó les propuestes presentaes pa la reconocencia patrimonial de la malla candasina y la danza de San Xuan de Nueva de Llanes. Tamién informó favorablemente de los espedientes de la redolada de la ilesia de San Antolín de Bedón, la danza del Corri-Corri, los Sidros y les Comedies de Valdesoto y el santuariu de Bendueños, en Ḷ.ḷena.

Na xunta, presidida pol conseyeru d’Educación y Cultura, Genaro Alonso, analizáronse tamién diverses propuestes para empecipiar los trámites de cara a la so inclusión nel Inventariu de Patrimoniu Cultural d’Asturies, el segundu nivel de protección contempláu na llexislación patrimonial de la comunidá autónoma.

Nuevos espedientes y nuevos BIC

L’organismu alcordó empecipiar los trámites pa declarar BIC la ilesia románica de San Pedru d’Arroxu (Quirós), construyida nel sieglu XIII y que cunta con una rica decoración escultórica en capiteles, amás de con pintures murales del sieglu XVII. El templu tuvo una complicada hestoria por cuenta de la inestabilidá del terrén sobro’l que s’asitia, que determinó un procesu de fundimientu del ábside que remató na ruina del edificiu nel sieglu XIX. Restauróse en 1940 y en 1989 realizáronse obres d’afitamientu.

Coles mesmes, van declarase BIC les termes romanes de Valdunu (Les Regueres), afayaes en 2004 al pie de la ilesia de Santolaya, un llugar onde en 1947 s’atopó’l cercu de Valdunu, depositáu nel Muséu Arqueolóxicu d’Asturies. Les escavaciones desenvueltes dexaron desaterrar parte del caldarium y del tepidarium –estancies del bañu caliente y templáu, respectivamente,— d’unes termes de notable entidá, que respuenden a la orientación canónica encamentada polos trataos d’arquitectura romanos. Parte de les estancies estiéndense so la ilesia de Santolaya de Valdunu, d’orixe tardoantiguu y ampliada nel sieglu XVIII.

El plenu estudió tamién la propuesta pa la reconocencia patrimonial de la técnica de la malla candasina y la so inclusión nel Censu del Patrimoniu Cultural Inmaterial de Asturies. Venceyada directamente cola puxanza de la industria conservero dende’l sieglu XIX, anguaño convirtióse nun elementu identitariu de les muyeres de Candás.

De la mesma, analizóse la solicitú de protección de la danza de San Xuan de Nueva, que pertenez a la categoría de danza prima pero con peculiaridaes propies del conceyu llaniscu. Arriendes d’esti pidimientu, va realizase un estudiu global de les dances tradicionales asturianes pa tener una visión integral que dexe escoyer les más destacaes por que seyan propuestes como BIC o pa la so inclusión nel Censu del Patrimoniu Cultural Inmaterial d’Asturies.El plenu del Conseyu de Patrimoniu dio por remataos los trámites pa la declaración de BIC de la redolada de protección de la ilesia de San Antolín de Bedón, en Llanes; del conxuntu monumental del santuariu de Bendueños, en Ḷ.ḷena, y de dos manifestaciones culturales: la danza del Corri-Corri, esclusiva de Las Arenas (Cabrales), y los Sidros y les Comedies de Valdesoto, en Siero.

Inventariu de Patrimoniu Cultural

Per otra parte, analizáronse ocho propuestes pa tramitar la so inclusión nel Inventariu de Patrimoniu Cultural:

–   La plaza d’abastos de Ribeseya (1936-1941), una construcción fecha ente 1936 y 1941, que destaca pol usu pioneru del formigón armáu.

–   La ilesia de Proacina, en Proaza, un templu d’orixe románicu, ampliáu nel sieglu XVIII y qu’atesora na so cabecera un conxuntu de pintures murales datable en dómina moderna.

–   El Túmulu del Españal, en Samartín del Rei Aurelio, alcontráu en 2015 ya investigáu arqueolóxicamente en 2016 y 2018.

–   La necrópolis d’Argandenes, en Piloña, atopada en 2010. Tien un pequeñu panteón familiar con materiales del sieglu VI. Los más destacaos tán espuestos nel Muséu Arqueolóxicu d’Asturies.

–   El xacimientu arqueolóxicu de Cuetu Chicu, en Benia (Onís). Alcontráu en 2012, correspuende con una cortil fortificada cercada allugada nel valle del ríu Güeña.

–   El xacimientu arqueolóxicu de Los Llodos, en Grau, venceyáu al Camín Real de La Mesa.

–   La ilesia de Santa María y antigua torre de Noreña, que data del sieglu XVI y ta construyida sobre un templu anterior de dómina medieval.

–   El barganal y el sistema hidráulicu del Monesteriu de San Salvador de Corniana, en Salas. Son los restos del antiguu sistema de trayida d’agües del cenobiu.

Intervención y estudios en bienes del prerrománicu

Amás, el plenu aprobó una serie d’actuaciones en bienes d’interés cultural y n’elementos del inventariu, ente los que destaca la intervención de restauración de los parámetros interiores y revocos qu’efectúa na actualidá l’Institutu del Patrimoniu Cultural d’España (IPCE) en San Miguel de Lliño. Nesti marcu restaurarán dos ventanes de l’actual cabecera.

Aprobáronse tamién diversos estudios previos realizaos a instancies del IPCE en Santuyano (Uviéu), San Salvador de Valdediós y San Salvador de Priesca. Son informes qu’analicen les característiques de los revocos y pintures murales del interior d’estos edificios y plantegen tratamientos de caltenimientu-remocique.

Coles mesmes, aprobáronse dos proyectos de meyora de la redolada del templu prerrománicu de Santo Adriano de Tuñón, p’afaer la vía d’accesu y soterrar tendíos aéreos. Los trabayos van rematar con un proyectu de llume esterior.