David Arango
David Arango nel programa "Más vale tarde" de LaSexta

Un llugar pa perdese… Ensin llugar a duldes, el suroccidente d’Asturies. Paezme un de los requexos más paraos nel tiempu de toa España. Valme cualesquier pueblu d’Ibias o de Degaña. Tienes que ponete a mirar delles vegaes al día el reló, porque tienes la sensación de que’l tiempu ta pasando muncho más despacio de lo normal.

Un llugar pa vivir… Tuvi delles oportunidaes de marchar fuera a trabayar y decidí que si nun m’echaben d’Asturies por falta de trabayu, demientres pueda ganame la vida equí, diba siguir viviendo n’Asturies, porque equí soi feliz, tengo a la mio xente y siento que formo parte de la tierra que piso por cuestiones culturales y sentimentales. Xixón ye’l mio pueblu y nun lu cambio por nada.

Un platu… Unu grande, ¡qué soi de bon xintar! (rises). Préstame abondo un platu que nun se fae en nengún restaurante que yo conoza, el pote de berces con castañes. Mio má, que ye de Zarréu, nel conceyu de Degaña y tolos mios raigaños vienen d’Ibias y Os Ozcos. Ellí, cuando había castañes echábense unes poques nel pote y esi tastu a seronda vuélveme llocu. Na casa los mios pas hai pote de berces al mediudía, mínimo, dos vegaes a la selmana.

Un postre… Nun soi mui llambión, soi más de salao. Préstenme abondo los xelaos y anque nun ye un postre típicu, el xeláu de La Ibense de Xixón ye un, como se diz agora, un «must».

David Arango
David Arango nel plató de «El Tiempo TPA»

Una sablera pa pasar el día… Como sablera, Estaño, pero como bona cabra que soi, prefiero’l pedreru. Pasé la mio adolescencia nel pedreru del camping d’El Rinconín, en Xixón, poro tien pa min un valor sentimental grande.

Un pueblín que nun podemos dexar de ver… Sotres ye para min dalgo de lo más guapo que tien Asturies. Col tiempu voi terminar teniendo una cabañina ellí de xuru. Ye un balcón de los Picos d’Europa en metá de los Picos d’Europa. Caleyar pel pueblu o dar un paséu pel camín que xunta Sotres y Tielve, un día d’iviernu, colos cantos nevaos ya llueu comer quesu Cabrales y una botellina de sidra ye un placer mui baratu.

Un chigre pa tomar unos culinos… Como bon asturianu, namás que sal el sol, busco asoleyar. Préstenme muncho los merenderos y en Xixón el mio merenderu preferidu ye Casa Segundo, onde se xinta riquísimo y tienen una sidra casero que ta de restallu.

Un parque natural pa visitar…¡Buf! Préstenme toos. Esto ye como entrugame a ver a quién quiero más, si a pá o a ma… Les viesques del Parque Natural de Redes na seronda, paécenme un espectáculu de visita obligada una vegada al añu

Una fiesta a la que nun faltar… Va dos años que voi a la Nueche Celta de Granda, en Xixón, y préstame muncho, pol ambiente y pola música en directo. Tengo munches ganes de dir a la fiesta qu’organiza Rodrigo Cuevas en Vegarrionda , Piloña, dixéronme que yera divertidísima. L’añu qu’entra nun voi fallar.

Un muséu pa recomendar… Hai poco conocí’l Muséu de la Sidra en Nava y esfrutélu muncho. Ye una visita mui guapa y amás pue completase dempués con unes botellines de sidra nos llagares qu’hai nel conceyu.

Un momentu de la hestoria…  Prestaríame tar na cordada de Pedro Pidal, Marqués de Villaviciosa y de Gregorio Pérez “El Cainejo” na primer ascensión al Picu Urriellu, en 1904. Foi un momentu poco multitudinariu, pero tar nesi abrazu que se dieron el Marqués y el Cainejo nel cantu de El Picu prestaríame abondo.

David Arango

Un baille pa pasalo bien… Na casa de mio ma, pa que suene a folixa de les bones, tienes que dicir bail.le, porque si non nun apetez tanto dir, ¡cuestiones sentimentales de la fonética! (rises). Dende guah.e’l Carmín de la Pola foi la folixa de tol grupu d’amigos de la mio infancia en Xixón y paez que llega esi día y apetez volver a xuntanos toos ellí.

Una pallabra n’asturianu que te preste… Seliquín, y nun m’entrugues el porqué, pero tien una fonética que me paez preciosa. Yá ye chocante, préstame repitida dos vegaes: seliquín, seliquín… como echándome la bulla por ser un burru. Tendrá que ver con alcordances de guah.e ya con bronques por ser mui brutu faciendo les coses, nun sé.

Una tradición que nun pue perdese… Hai tantes que tan perdiéndose… ye una pena. A min prestaríame muncho deprender bien, porque fáigolo fatal, a segar cola gadaña y cabruñar curioso, y ye dalgo a lo que-y queden dos díes, porque los praos siéguense toos a máquina ya llueu nun s’esveiran, poro la gadaña va quedar pa tar colgada de dos gabitos nos comedores rústicos

Una espresión n’asturianu que te preste… La cabra col viciu, da col cuernu en culu. Dicíala mio güela munchísimo y ye tan actual, que yo repítola a toes hores. Hai xente mui aburrío, que tien munchu tiempu pa folgar y terminen faciendo escentricidaes y coses rarísimes.