Nos meses de payares y d’avientu del 2014 el Serviciu de Normalización Llingüística de Corvera desarrolló un taller d’historia d’Asturies n’asturianu, que recibió’l nome d’Una entruga pa cada historia (versu del poema “Entrugues d’un obreru de la que llee un llibru” de Bertol Brecht).

Al igual que na edición del 2014, tamién nesta ocasión el taller busca introducir na Hestoria d’Asturies a les persones interesaes, siempres dende un plantegamientu abiertu y rigorosu al empar, col que s’acerquen a cuestiones como’l Principáu d’Asturies, la cultura na Edá Moderna asturiana, les condiciones de vida del campesináu, el papel de la Ilesia, la Xunta Xeneral, la influencia de fechos hestóricos esternos na realidá asturiana, ente otres cuestiones más.

Esti taller va impartilu’l técnicu responsable del Serviciu de Normalización Llingüística de Corvera, Rafael Rodríguez Valdés, que ye Llicenciáu n’Hestoria pola Universidá d’Uviéu y Postgráu n’Archivística pola UNED, amás de ser autor de distintes publicaciones venceyaes cola Hestoria d’Asturies. D’otra banda, va contase cola participación de trés hestoriadores especialistes na dómina moderna que van ufrir charles temátiques demientres el taller.

El taller, de calter gratuitu y con una duración de dieciséis hores, va desarrollase en sesiones de dos hores tolos miércoles, n’horariu de 18 a 16 hores, del 17 d’abril al 12 de xunu. Les sesiones del cursu van facese nel Aula 2 del Centru Sociocultural de Les Vegues.