Regates a remu: Demientres les fiestes llocales de branu, entámense carreres de botes populares en dellos puertos del occidente asturianu. Nos años sesenta y setenta del sieglu pasáu destacaron pola participación alta y pola cantidá de xente qu’acudía, sobremanera a les que se celebraben nel Festival del Mar de Tapia.

N’asturies hasta nun va muncho, les tripulaciones que participaben nes regates tradicionales d’embarcaciones a remu yeren masculines dafechu, con dalguna escepción como les de botes tripulaos por mozuques braniantes con timoneles homes, celebraes en Lluanco en 1915.

Xuegu de la llave: L’orixe del xuegu de la llave n’Asturies ta venceyáu a la llegada del ferrocarril a mediaos del sieglu XIX, cuando los trabayadores ferroviarios usaben la llave de víes d’una forma lúdica. Medró muncho ente 1950 y 1965 , cuando se practicaba nos patios de chigres, sidreríes y merenderos del centru d’Asturies.

Tiru cuerda: El tiru cuerda ye un xuegu popular de fuercia mui practicáu ente los paises atlánticos. Nél compiten dos equipos puestos en filera ún enfrente del otru. Foi deporte olímpicu ente 1900 y 1920.

Tiru al palu: Dos participantes siéntanse unu en frente del otru colos pies sofitaos nuna tabla. Garrándose dempués a un palu, van tratar de llevantar al so oponente o fai-y soltar el palu. Ye al meyor de trés tiraes y escuéyese campu, esto ye, de mano, unu cueye’l palu coles manos pegaes pela parte interior del palu, y na siguiente tirada, tocará-y pela parte esterior. En casu d’empate, llánzase una moneda y escuéyese la forma d’agarre.

Tags: