Colunga celebra esta selmana’l XII Salón del Títere “Saltitiricol”

Ente’l 21 de marzu, Día Internacional del Títere y la Marioneta y el 27 de marzu, Día Mundial del teatru va celebrase la docena edición de qu’entama añalmente’l Conceyu de Colunga.

El xueves 21 a les 17 hores na Sala Loreto de Colunga, va entamar esti salón con Carlos
Alba y la so obra Las abarcas desiertas. Embaxo la dirección de Alexander Curcic y con títeres de Fola Zeceva, sobro l’escenariu l’autor ya intérprete Carlos Alba y los sos títeres y oxetos van cuntar les aventures pel mundu d’un xuglar qu’atopa un neñu pastor a quien anguaño nun-y traxeron nada los Reis. Dambos deciden entamar un llargu viaxe escontra l’Oriente. Ellí afayen que Gaspar, Melchor y Baltasar fueron secuestraos pol Señor de la Guerra, y xuntos van tener que lliberarlos. La hestoria inclúi títeres y música en directo.

El vienres 22 a les 17:00 hores y tamién na Sala Loreto de Colunga, el grupu Tres
Colores presenta En el fondo del mar, interpretada por Mónica Fernández y Vanesa González. Na obra, dos payases dan rienda suelta a la so imaxinación viéndose somorguiaes nun fondu marín tan idílicu como peculiar. Nél habiten pexes, aguamales, pulpos y otros animales despreocupados por tou. Caún ye feliz a la so manera. Pero… un día de ñube llega una folada d’estraños artiluxos que fai que too camude. Acaldía que pasa siéntese más cansaos, enfermos, ensin imaxinación, la comida tien un tastu estrañu… ¿Qué ye lo qu’asocede?

El sábadu 23 a les 17 hores la Sala Loreto acueye la obra d’El Callejón del Gato: La neña de les trences al revés, escrita por Iris Díaz Trancho y empobinada ya interpretada por Ana Eva Guerra y Moisés González. Nesta pieza Thana, la protagonista, miraba pa la lluna. Asomada a la ventana de la so casa comentaba cómo-y gustaría falar con una neña como ella. Al otru llau del mundu, Deva dibuxaba estrelles. Con un llapiceru diba semando la fueya de puntinos. Y nel centru de toos ellos, la lluna. Redonda como una tarta de merengue…

Esi mesmu sábadu, les 18 hores, va celebrase un taller de construcción de títeres pa la reciella de 5 a 12 años. L’actividá tien les places llindaes y ye gratuitu, previa inscripción
na Casa de Cultura de Colunga n’horariu de 10 a 14 y de 17 a 20 hores, hasta’l día 21 (de llunes a xueves)

El miércoles 27 a les 11:30 hores na escuela Infantil “El Nieru”,  Tras la Puerta Títeres va poner n’escena ¡Al circo!, narrada ya interpretada por Ana Laura Barro. Un espectáculu con cuentos, xuegos, cantares, títeres… “¡Al circo!” ye xuegu ya imaxinación.

Tags: