Coincidiendo col Día de la Muyer, facemos un repás  a dellos colectivos de muyeres trabayadores que tuvieron un papel relevante na hestoria d’Asturies.

LES CIGARRERES

L’edificiu de La Tabacalera, un símbolu del barriu Cimavilla, en Xixón, cunta una de les hestories fundamentales de la muyer en trabayu. Nel añu 1842 el conventu qu’hestóricamente había nesti llugar conviértese nuna fábrica de tacabos, siendo una de les primeres industries n’Asturies que s’abre al trabayu de les muyeres. Les cigarreres representaben cuasi la totalidá de los trabayadores de la fábrica, con una plantía d’unes 1.600 muyeres. Caúna d’elles taba especializada nun formatu de tabacu (puru, cigarru, pitos) y tresmitíen el so trabayu de madres a fíes. Les cigarreres fueron un símbolu de llucha obrera. Yá en 1903, inda enantes de l’incendiu na fábrica Triangle Shirtwaist de Nueva York, convoquen una fuelga poles condiciones probísimes (magar el so importante llabor vivíen en total probitú) nes que taben. La fuelga tuvo un siguimientu total y duró dos selmanes, con una victoria nes negociaciones. Un exemplu na so época, y tovía anguaño, de movimientu obreru, que dexa un posu cultural y social en Xixón nos sos más de 150 años d’hestoria.

GANADERES

“Les muyeres diben a la cuadra… pero los homes a la cocina non” 

(Josefina Valdés Valdés, Les Regueres)

La ganadería foi per munchos sieglos el mou de vida tradicional nel ámbitu ruraliegu asturianu. En tou esti tiempu los homes recibieron el reconocimientu públicu esclusivu pol llabor,  al ser ellos quien acudíen en representación de la ganadería a les feries, concursos ganaderos o los recordaos como vaqueiros treshumantes. Sicasí, la realidá dexa a les clares lo contrario: la figura femenina non solo foi perimportante col so trabayu, sinón que davezu facíense cargu tamién del trabayu diariu na esplotación. 

Esta omisión hestórica empezaba dende’l momentu que tocaba computar la  población activo del mundu agrariu: el llabor de la muyer (con un marcáu calter familiar) quedaba sobordináu dafechu a la figura del patriarca, computando namás esti miembru como trabayador. Inclusive cuando les xeres asumíes nun suponíen les propies del xéneru, l’home siguía siempres presentáu como miembru activu, cuando yera la muyer la que s’ocupaba enteramente del ganáu

Por suerte, anguaño llegamos a datos más veraces. Falamos de que, n’Asturies, siete de cada diez ganaderíes tán en manes de muyeres. Y ye que, magar de la so invisibilización, magar de la importancia cada vegada más probe que tien esti sector na economía asturiana, estes muyeres consiguen facese valir y sostener col so esfuerciu esti trabayu. La clave d’esti ésitu ye de sobra conocida, idiosincraticamente femenina: l’andecha. Valiéndose de les redes sociales, programes como Ganaderes con Talentu ayuden a 73 ganaderes a intercambiar idees sobre veterinaria, llideralgu o xestión empresarial, col envís de xestionar meyor y modernizar la esplotación ganadera. 

MINERES

“Una escena mui corriente en tola cuenca asturiana: les muyeres que carguen vagones. Xeneralmente son moces, quiciabes la muyer o la fía d’un mineru”

Con esta fras quedaba resumíu pal cronista d’El Carbayón (1929) el llabor d’aguadores, llampisteres, vagoneres, carboneres o entibadores. Foron estos dalgunos de los oficios desempeñaos poles muyeres mineres asturianes, muyeres que soportaron unes condiciones sociales denigrantes al carecer non solo’l pesu d’un sector con condiciones hestóricamente pésimes, sinon tamién les d’una socieda machista que cargaba n’elles tol pesu de les responsabilidaes familiares. 

Amás, igual que lo que-yos pasaba a les ganaderes, las regles del drechu llaboral facía bien de vegaes que dalgunes d’elles nun pudieren cobrar la nómina (drechu exercíu pol so home),  que’l so sueldu fuera la metá que’l de los homes (inclusive trabayando más hores qu’ellos) o que nun tuvieren drechu a recibir una paga por silicosis porque trabayaben nel esterior -el reglamentu a partir de 1897 nun va dexar a la muyer  trabayar dientro’l pozu-, anque fueren elles les que más polvu respiraren. Si yá yera duru’l trabayu de mineru, quién ye quien a imaxinar cómo sedría’l d’aquelles mineres, qu’amás habríen “entibar” la vida familiar. 

A lo llargo’l sieglu XX el so trabayu dientro, asina como’l sofitu fuera la mina, fueron fundamentales nes constantes lluches sindicales. Eso sí, too ensin dar de llau les sos propies reivindicaciones coles que consiguieron, en 1992, que’l Tribunal Constitucional reconociera’l drechu de la muyer a trabayar na mina.