Celébrase la entrega de premios del Concursu de Cuentos pola Oficialidá

El sábadu que vien, 1 d’avientu, el Conceyu Bimenes va facer entrega de los premios del XXI Concursu de Cuentos pola Oficialidá del Asturianu. L’actu va tener llugar nel Muséu Casa de les Radios, allugáu en Suares, a les siete la tarde.

Nel trescursu del mesmu’l ganador del certame, Héctor Pérez Iglesias (Arlós, Llanera, 1978) lleerá la so obra, “Que trata de lo que me cuntó’l mio mayestru al dexar l’abadía”, que llevó’l 1er premiu, 600 euros. El 2u premiu, dotáu con 450 euros, foi pal cuentu “Enkidu y la eternidá”, de Rubén Magadán Cosío (La Collá, Siero, 1985), y Armando Gutiérrez Rodríguez (Ciñera, La Pola Gordón, 1965) algamó’l 3er premiu, 300 euros, con “Nun requexu”.

Nesta edición el xuráu tuvo formáu polos escritores Xulio Vixil Castañón, Francisco Álvarez González y Pablo Rodríguez Medina. L’actu completaráse cola actuación del monologuista Carlos Alba, que col so personaxe Cellero va representar un monólogu que ta d’estrena: “La talla 38 o fuera los grilletes de les fañagüetes”.

Tags: