in

Castrillón, la mar que ver

Castrillón ye un conceyu costeru conocíu como’l «Conceyu de les siete sableres» sicasí son más de siete les que percuerren el so llitoral dende San Xuan hasta Bayas.

Ye abondo difícil que nun atopes en Castrillón una sablera que te preste, porque hai pa tolos gustos: urbanes y bullicioses, pequeñes, afayadices cales, pa los amantes del surf o pa dir a pasiar colos nuesos amigos los perros.

Sablera de San Xuan de Nieva

La de San Xuan ye una sablera de arena blanco asitiada nun enclave declaráu Monumentu Natural gracies al so impresionante sistema dunar, les «Dunes del Espartal», un de los más estensos y guapos d’Asturies. Ye una sablera llarga, con foles fuertes que la faen perbona pa la práctica del surf y otros deportes d’agua.

Caminado peles pasareles que van dende San Xuan, llegamos a Salinas, una espectacular sablera urbana que ye de les más concurríes d’Asturies. Nesta sablera ye vezu ver escueles de surf y surfistes llocales dibuxando un paisaxe que se convirtió en seña d’identidá d’esta llocalidá. Reconocida col distintivu de bandera azul, la de Salinas ye en ensin dulda, la sablera por escelencia de Castrillón.

Salinas

Mar y minería xúntense na sablera d’Arnáu, una fondigonada guardada y afayadiza, de sable y piedres, qu’escuende una ayalga, yá qu’al rodiu d’ella hai importantes restos del Patrimoniu Industrial y Mineru de Castrillón y de la dómina del Devónicu. Si vas a Arnáu, nun escaezas visitar la que foi la primera mina de carbón d’España, güei convertida en Muséu.

La de Santa María’l Mar ye una sablera de sable prieto, formada por dos cales urbanes (El Puertu y La Llada) nun llugar turísticu que cunta na so rodiada con camping, restoranes y amplios aparcaderos. Ye un arenal tranquilu y con poques foles dende’l que pue vese la islla La Lladrona. Ye la otra sablera de Castrillón que cunta col distintivu de bandera azul.

Santa María del Mar

Dempués de Santa María’l Mar atopamos Bahínas, una sablerina, resguardada del aire, de sable escuro y regodones, qu’agospia una gran guapura paisaxística. De fácil accesu y bien equipada, ye ideal p’aquellos que busquen tranquilidá y al mesmu tiempu, bonos servicios.

Bahínas

Na llocalidá de Bayas atopamos dos arenales bien distintos. Per un llau, tenemos la sablera de Munielles, de fácil accesu ya ideal pa los que busquen un arenal poco concurríu y tranquilu nun entornu incomparable. Con marea baxa, dende ellí pue accedese a otres cales entá menos frecuentaes, como El Regueru o la Cala Cordial.

Munielles

Y pa finar el nuesu percorríu peles sableres de Castrillón, llegamos a El Sablón, un arenal de cuasi 3 quilómetros de llargu qu’acueye un Monumentu Natural formáu pol so espectacular conxuntu dunar y la Islla de la Deva. A lo llargo de la so estensión podemos alcontrar diferentes zones a les que podemos dir acompañaos poles nueses mascotes, na parte occidental y una zona frecuentada por naturistes, «Requeixinos», na so parte oriental.

Bayas

Esti branu nun duldes, ve a esfrutar de les sableres de Castrillón, porque en Castrillón tienen la mar que ver.

Munieḷḷos

Cangas del Narcea, tres los pasos del osu

El Centro Niemeyer revive'l Fin d'Añu de 1979 con 'The Hole Zero'

San Mateo abre una fin de selmana enllena de folixa