in

Cangas del Narcea, tres los pasos del osu

Munieḷḷos
Munieḷḷos

Siguiendo los pasos del pacíficu osu pardu pue llegase a afayar los llugares más escondíos de Cangas.

Una tierra de valles serraos, montes milenarios y pueblinos onde afayar la esencia d’Asturies. Llugares verdes de naturaleza pa esfrutar con un paséu, practicar senderismu, realizar salíes d’observación de fauna o esfrutar de caminos en bici conociendo’l Parque Natural de las Fontes del Narcea, Degaña y Ibias y la Reserva Natural Integral de Muniel.los (Reserva de la Biosfera y Rede Natura 2000).

Pon unos zapatos cómodos porque nun vas poder parar de caleyar, nun escaezas que Cangas destaca pol so ricu patrimoniu cultural. Entama pol Monesteriu de Courias (sieglu XI), remocicáu como Parador Nacional de Turismu; la villa de Cangas caltién nel so cascu hestóricu palacios, ilesies, pontes…

Santuariu de La nuesa Señora del Xardón

Nun dexes de ver el Centru dedicáu al dramaturgu asturianu Alejandro Casona en Bisuyu o los pueblos onde abonden palacios y casones, ilesies de tradición románica y gótica y construcciones típiques como horros, brañes, cortinos, corripes, molinos y fontes.

Pa los apasionaos pola artesanía en Cangas entá perviven vieyos oficios como los alfareros qu’ellaboren la cerámica negro, los madreñeiros, los ferreiros o bien cerquina, ente Degaña ya Ibias, los cunqueiros.

Si te presta conducir vas pasalo podre peles retorcíes carreteres del conceyu. La Ruta del Xardón, la de Sierra o La Ruta de los Puertos avérente la hestoria y paisaxe de Cangas.

Si la gastronomía y el bon vinu tán na to llista d’imprescindibles nun viaxe, Cangas nun va decepcionate. Una escelente materia primo ye la base pa la esquisita cocina canguesa. Tienes que probar el caldu de berces, la carne roxo, el butiel.lu o’l tradicional pan de lleña.  Too ello acompañao de los vinos, porque Cangas tamién ye tierra de vinos. Acoyíos a la Denominación d’Orixe Protexida Vinu de Cangas son delles les bodegues que vas poder visitar y nel Muséu del Vinu de Cangas afondar sobre les particularidaes de los sos vinos, costumes y tradiciones. Nun hai nada como prebar el vinu de Cangas d’un xeitu tradicional, bebiendo del cachu, un cuencu de madera.

Y ye qu’amás, Cangas ye, dende l’añu 2018, el primer Destín ensin Gluten d’España.

Amaia, Vanesa Martín y Rodrigo Cuevas, esta seronda en Llaboral

Amaia, Vanesa Martín y Rodrigo Cuevas, esta seronda en Llaboral

Castrillón, la mar que ver