En plenu valle d’Ayer pero perteneciente al conceyu de Mieres, atopamos una ayalga escepcional dientro del patrimoniu industrial asturianu, el Pobláu mineru de Bustiello, que dende 2017 cuenta col reconocimientu de Bien d’Interés Cultural. 

La hestoria de Bustiello remóntase a les décades de 1890-1925, cuando la Sociedad Hullera Española, perteneciente al grupu empresarial del Marqués de Comillas, Claudio López Bru, fixo’l pobláu cola idea de combinar la convivencia armónica de los mineros nun ambiente de fuerte ideoloxía católica col paternalismu industrial, sometiendo a un rigurosu control tanto llaboral como social a los propios mineros, los que pa ser merecedores de participar nos sorteos de viviendes obreres habíen probar la so llealtá a la empresa amás de tener una conducta intachable. 

Estes viviendes organizábanse en trés cais y contaben con un pequeñu güertu, a diferencia de los xalés, dellos d’inxenieros mostrábense distinguíos siguiendo la moda arquitectónica de la época con amplies balconaes y galeríes.

Amás del propiu entramáu de les cais, la construcción más guapa ye la Ilesia de San Cloyo, comúnmente conocida como Ilesia de Bustiello o “pequeñu vaticanu”, n’alusión al fervor relixosu que caracterizó’l mou de vida na zona. De clara inspiración hestoricista y gótica, nel so interior destaca una orixinal decoración usando símbolos propios de la minería como llámpares, pales y picos, baxo l’atenta mirada de la imaxe de Santa Bárbola, patrona de los mineros; y un altar mayor con un delicáu tallaxe en madera onde aparecen representaos los principales negocios del Marqués: un mineru d’aspectu mitolóxicu lluchando col picu y la pala; un barcu, que representa la Compañía Transatlántica del Marqués y una llocomotora, en referencia a la Compañía de Ferrocarriles del Norte y precursora de l’actual RENFE.

Otru edificiu destacáu foi’l Casinu, diseñáu pa convertise na Sede del Círculu Obreru Católicu, equipáu con biblioteca, aules, salón d’actos y sala de xuntes, onde sedríen los Hermanos de la Salle los encargaos d’organizar actividaes pa obreros y families cola intención de controlar el tiempu llibre de los vecinos y así alloñar a los mineros de les males costumes como l’alcohol y les revueltes sociales y polítiques que pudieren provocar altercaos contra la patronal.

Fixéronse tamién otros edificios col propósitu de cubrir les necesidaes de dellos habitantes como la escuela de neños (tamien baxo la tutela de los Hermanos de la Salle), siendo güei albergue xuvenil, un economatu, una escuela de neños y neñes pero sobre manera habemos destacar el Sanatoriu, fechu a principios del sieglu XX al otru llau del ríu pero venceyáu al pobláu, y al que’l pasu los años y el so deterioru nun impiden facese una idea de la maxestuosidá cola que llució l’edificiu, amás d’ostentar el títulu de ser el primer hospital d’empresa d’España.

Podemos observar que’l pobláu de Bustiello yera claramente diferente al restu les cuenque mineres d’Asturies mesmo pol so diseñu como pola preocupación de meyores del Marqués, invirtiendo nel propiu pueblu de Santa Cruz o nel vecín Uxu, ganando la simpatía de los habitantes de la zona magar el duru adoctrinamientu relixosu al que yeren sometíos, tal ye asina que’l procesu de beatificación del Marqués sigue abiertu dende 1948.

El deterioru del pobláu como esplotación vieno de la mano de la crisis del carbón nos años 60, cuando la SHE (Sociedad Hullera Española) pasó a formar parte de la empresa pública Hulleras del Norte, S.A., y les viviendes arriendaes son vendíes a los sos inquilinos.

Col propósitu de preservar la so importancia patrimonial y cultural, güei Bustiello cuenta con un centru d’interpretación nunu de los vieyos xalés asituáu frente a la ilesia. Pa visitalu ye preciso acutar enantes.

Centru d’Interpretación de Bustiello (Santa CruzMieres)

Teléfonu985 422 185

Tags: