Batalla de los Gallos en Metrópoli

El festival xixonés inaugura'l so escenariu principal col mayor espectáculu de freestyle rap, onde los participantes van tener que lluchar poles postreres vacantes de la final nacional
Batalla de los Gallos del añu pasáu en Metrópoli.

La Red Bull Batalla de los Gallos vuelve a Metrópoli con ‘La última oportunidá‘. Tres l’ésitu del añu pasáu, el 28 de xunu van salir los 2 postreros MCs, que van completar la llista de los 16 gallos que se van enfrentar na gran final nacional. Los participantes clasificaos que van dir a esta última oportunidá de Metrópoli son: Elekipo, Nielo y Sara Socas, de la semifinal de San Fernando, Cádiz; y Hander, Errecé y NQP, de la semifinal d’Alicante.

A estos participantes sumaránse otros dos por aciu un procesu de votación al traviés de la web de Red Bull Batalla de los Gallos. D’esta manera, van ser ocho los gallos participantes que van dir a ‘La última oportunidá’ de Metrópoli. 

Los participantes que queden en primer, segunda y tercer posición en ‘La última oportunidá’ van clasificase para la final nacional, que va tener llugar el 13 de xunetu nel RCDE Stadium de Barcelona.

‘La última oportunidá’ de la Red Bull Batalla de los Gallos va inaugurase nel escenariu principal de Metrópoli’l vienres 28 de xunu a les 21 hores. Versos, improvisación ya inxeniu daránse cita nesta parada, onde l’espectáculu ta aseguráu. Amás, los siguidores que nun puedan esfrutalo en Metrópoli, podrán siguir por streaming na so canal de Youtube y tamién se va siguir en directu al traviés de les redes sociales col #BatallaDeLosGallos.

Tags: