La fuelga feminista de 2018 convocáronla organizaciones feministes y aliaes de la llucha polos drechos de les muyeres en tol mundu, produciéndose l’adhesión de 177 países en total. Anque yá fuera convocada n’años anteriores, el respaldu social y mediático fixo de 2018 un añu clave na llucha feminista al dase esi 8 de marzu la participación en tol estáu d’un total de 429 asociaciones y colectivos, y, según la Delegación de Gobiernu, la concentración, namás na ciudá de Madrid, de más de 170.000 persones. N’Asturies, la manifestación que tuvo llugar en Xixón cuntó cola participación de más de 20.000 persones.

Esti 8 de marzu de 2019 vuelve convocase una fuelga xeneral de muyeres que s’empobina alredor de seis exes fundamentales: trabayu, educación, curiaos, consumu, racismu, y violencia de xéneru. Los sindicatos CNT, CSI y la Conferencia Intersindical convoquen una fuelga xeneral de 24 hores, mientres qu’UXT y CCOO llamen a los paros temporales (2 hores) nel ámbitu llaboral y estudiantil, cola salvedá de la Federación de la Enseñanza de CCOO, que convoca una fuelga xeneral de 24 hores nel sector educativu. Nel casu de la Universidá d’Uviéu, el 20 de febreru’l Vicerrectoráu d’Estudiantes realizó la comunicación oficial de la xornada de Paru Académicu Xeneral pal 8 de marzu, coo recueye’l Frente Feminista d’Uniuvi nes sos redes sociales.

A lo llargo de tola selmana fixéronse diverses concentraciones y actividaes al envís de concenciar sobro la necesaria participación de toes y toos el 8M. Ye una fuelga de calter mistu que n’Asturies va cuntar con concentraciones y pasucais, que van partir de les places de cada conceyu a les 12 del meudía, y una manifestación xeneral que va dar empiezu na Plaza Toros de Xixón a les 19 hores. Pa esi día habilitáronse puestos de cuidu n’Uviéu, Xixón y Avilés, con serviciu d’atención a neños y neñes y persones dependientes, amás d’un serviciu d’alimentación básica.

Anque se trate d’una fuelga con calter mistu, dende los colectivos feministes pídise la collaboración de los homes a lo llargo del día pa tratar de facilitar la mayor asistencia de muyeres a la fuelga ufiertando cubrir les sos xeres nel trabayu, asistir por elles a clas, ocupase de los cuidos domésticos o asistiendo a los puestos de cuidos habilitaos… Amás, a la d’allegar a les manifestaciones, encamiéntase-yos tratar de caltenese na retaguardia ensin ocupar puestos nes primeres files nin de llideralgu ya incorporándose al bloque mistu que, nel casu de la manifestación de Xixón, va atopase  a partir del cordón de cuidos y el Bloque estudiantil.

Fuelga de cuidos

Les muyeres dediquen como media cuasi’l doble de tiempu que los homes al cuidu y les xeres doméstiques : 26,5 hores frente a 14 hores. El cuidu del llar, los fíos, familiares, enfermos… son actividaes que queden apostraes na so mayoría a les muyeres. Estes xeres, non solo nun tán remuneradas, sinón qu’obliguen a les muyeres a abandonar el so empléu o amenorgar la xornada llaboral pa poder conciliar dambes responsabilidaes. Llámase a la fuelga de cuidos pa poner en valor el trabayu ensin pagar de les muyeres, amás de pa reivindicar una repartida igualitaria de les xeres doméstiques y el cuidu ente tolos miembros del llar.

P’arreglar estes situaciones propónse ufiertar escueles de 0 a 3 años públiques, gratuites y dientro del sistema educativu; la ratificación del Conveniu 189 de la OIT pa equiparar en drechos a les trabayadores doméstiques; la equiparación de la duración de los permisos de maternidá y paternidá retribuyíos, dientro del marcu de la diversidá de families; l’aumentu del financiamientu de la llei de dependencia, y poner especial atención en colectivos más vulnerables, garantizando los drechos de les muyeres migrantes y de la muyer del mundu rural.

Fuelga Antirracista

Esta exa de la fuelga pretende integrar a toles feministes na llucha de les muyeres migrantes y racializaes, un sector doblemente discrimináu por cuenta del so sexu y orixe racial, reivindicando dientro del propiu colectivu de muyeres que s’esanicie’l discursu machista y esteriotipáu esistente escontra d’elles.

Esta intervención pasa pola esixencia de formación y protocolos d’actuación antirracista nos casos de violencia machista cuando la víctima ye inmigrante, y tomar midíes efectives contra tratar de muyeres brindándo-yos amplies garantíes llegales: sanidá universal, respetu a la protección de datos de les muyeres inmigrantes (ensin documentación). La exa antirracista pide la denuncia a la discriminación racista nel mundu llaboral coles consiguientes sanciones a empreses que criminalicen o nun contraten a muyeres por cuestiones raciales, y la visibilización de les muyeres inmigrantes que trabayen nel Serviciu d’atención doméstica.

Fuelga contra les violencies machistes

Les 259 sentencies por asesinatos de muyeres en cinco años, amás de les 983 muyeres asesinaes en tol estáu poles sos pareyes o expareyes dende 2003 faen evidente la necesidá d’establecer una Llei de Violencia de Xéneru que non solo ampare y garantice la seguridá de les víctimes que sufren violencia machista promoviendo la revisión d’un sistema xudicial a les clares ineficaz a la de resolver estes cuestiones, sinón que tamién impulse un modelu d’educación afeutivu sexual n’igualdá y respetu a la diversidá sexual en toles etapes escolares. Tienen d’aplicase protocolos contra la violencia sexual por razón de sexu nes empreses y alministraciones públiques, midíes pa protexer a les muyeres LBTI de la violencia que s’exerz contra elles, amás tienen de desenvolvese campañes pa combatir la ideoloxía machista y patriarcal, campañes que visibilicen la esistencia d’una violencia machista estructural.

Fuelga de Consumos

El capital depende y precisa de la segregación y esplotación de la muyer por eso esti 8M llamar a les muyeres a realizar un paru de consumos de 24 hores que busca una baxada efectiva de la tasa rosa, del impuestu rosa sobre productos d’hixene intima amás de la erradicación d’una publicidá que nun utilice’l cuerpu de la muyer como reclamu nin como un productu de consumu. Amás, con esta fuelga tamién pretende reivindicase unos modelos de compra encontaos en criterios éticos y sostenibles por aciu los que se fomente’l comerciu llocal y el sofitu al sector agroganaderu sostenible de cercanía (consumu de productos de km 0) amás del sofitu a cooperatives y Pymes llideraes por muyeres.

Son estes dalgunes de les razones esistentes pa secundar una fuelga de consumos qu’evidencie la forma na que s’asignen sistemáticamente “los recaos” y les compres a les muyeres, y como, poro, la mayoría de los puestos directivos tán ocupaos por homes, quien s’atoparíen exentos d’estes xeres

Fuelga llaboral

Dos de les grandes lluches de les muyeres nel mundu llaboral nel últimu añu son la fienda salarial y el techu de cristal. La fienda salarial ye l’indicador qu’informa sobre la diferencia salarial ente homes y muyeres. N’España según el INE, nel añu 2016 los homes cobraron de media 25.924,43 euros, frente a los 20.131,41. Los homes ganen, como media, casi un 29 % más que les muyeres.

El techu de cristal ye la llimitación velada del ascensu llaboral de les muyeres al interior de les organizaciones. Asina solo un 22,5% de muyeres son conseyeres d’empreses del Ibex-35; les muyeres apenes representen un 10,9% del total de miembros de la RAE; namás hai 2.136 muyeres caderalgues d’un total de 10.017 y de los 77 miembros qu’integren el Tribunal Supremu, namás 11 muyeres /un 14%).

Tamién se pide la ratificación y aplicación del conveniu 189 de la OIT sobre los y les trabayadores domésticos, amás de la regulación de midíes contra l’acosu llaboral y sexual nel trabayu .

Fuelga educativa

La exa de la fuelga educativa reclama que s’enllanten protocolos contras les agresiones machistes nos centros educativos asturianos amás de la creación de la figura del especialista en xéneru nos centros d’enseñanza medies, que garantice y atienda cuestiones rellacionaes cola igualdá dientro de les aules. Amás, plantégase la introducción d’una asignatura d’educación afeutivo-sexual en primaria y secundaria que respete les diverses identidaes y orientaciones sexuales, y tamién la inclusión d’asignatures de xéneru nos graos universitarios con oxetu de desenvolver una perspectiva feminista que s’estienda a la perspectiva qu’empobina los métodos d’investigación y el desempeñu de puestos de trabayu. Per otru llau, esta fuelga educativa busca que se garantice’l cumplimientu de los derechos del personal investigador y l’esistencia de puestos de trabayu non precarios que dexen la conciliación familiar.