Asturies estrena colección de guíes turístiques oficiales

El Gobiernu d’Asturies presenta’l catálogu de guíes turístiques pa 2019. La colección, formada por 12 espublizaciones, céntrase nos productos prioritarios del Programa de Turismu Sostenible 2020. En total, van editase más de mediu millón d’exemplares en seis llingües pa reforciar la estratexa de promoción internacional.

El conseyeru d’Empléu, Industria y Turismu, Isaac Pola, presentó estos díes la colección, que ta basada na campaña de promoción Vuelve al Paraísu. El catálogu céntrase na naturaleza, el turismu rural, cultural y activu, les ciudaes, la mariña y pueblos marineros, los Caminos de Santiagu, la gastronomía, y el patrimoniu industrial. Asina, ellaboróse una publicación temática específica pa caún d’ellos, amás d’una guía xeneral de destín y otros dos centraes nel ecoturismu y el sector de xuntes y congresos.

“Pa llanzar esta colección cuntemos cola participación d’escritores, periodistes y profesionales de diverses disciplines que rellaten les sos impresiones sobre Asturies al traviés de rutes y esperiencies alredor de caún de los nuesos productos turísticos”, esplicó’l conseyeru.

El Gobiernu va espublizar ediciones en seis idiomes, incluyíu’l castellán, pero non l’asturianu, “cola fin de reforciar la estratexa de promoción d’Asturies como destín turísticu en cinco países prioritarios: Reinu Xuníu, Francia, Alemaña, Italia y Portugal”. En total, van editase más de mediu millón d’exemplares que tamién van tar disponibles pa la so descarga na páxina web oficial de Turismu d’Asturies (www.turismoasturias.es).

Nel actu de presentación, que se celebró nel Muséu Arqueolóxicu, participaron tamién, el director xeneral de Comerciu y Turismu, Julio González Zapico, y los autores del conteníu de los exemplares.

Les guíes van distribuyise na próxima edición la Feria Internacional de Turismu (Fitur), que se va celebrar en Madrid del 23 al 25 de xineru.