Asina va ser l’estand d’Asturies en Fitur

El Principáu adelántase el Xacobéu 2021 con un espaciu que va tener los itinerarios asturianos como protagonistes

0
8

Los itinerarios asturianos del Camín de Santiago constituyen l’elementu central del estand d’Asturies en Fitur. La comunidá anticipa d’esta miente la celebración del Xacobeo 2021 cola mira d’encarar esa cita colos meyores espectativas. La Feria Internacional de Turismu 2020 va celebrase en Madrid del 22 al 26 d’esti mes.

L’estand ocupa 692 metros cuadraos, estrena un diseñu que llogra la máxima eficiencia. L’espaciu integra referencies de la rexón al traviés de xuegos ente’l verde del paisaxe y les llinies arquitectóniques d’edificaciones contemporánees. Too ello siempres baxo la llinia creativa de la campaña Vuelve al Paraísu.

La sostenibilidá medioambiental va tar bien presente. Pa ello, amenorgóse l’impactu ecolóxicu col usu intensivu de materiales sostenibles na construcción y la decoración del pabellón. Utilizaránse materiales reciclaos nel menaxe y van eliminase los plásticos d’un solu usu, amás d’usar materiales recicables como soporte de les publicaciones turístiques.

El protagonismu del Camín del Santiago estiéndese a les más de les cuarenta presentaciones de proyectos, iniciatives y eventos impulsaos por promotores tanto públicos como privaos. La comunidá tamién va tar presente en dalgunos de los espacios temáticos que se celebren de forma paralela como Fitur Screen, al traviés de l’Asturies Paraísu Natural Film Commission; en Fitur MICE, destináu al turismu de negocios y xuntes, y nel foru B2B pa la contratación especializada n’ámbitu internacional.

Actividaes mientres la fin de selmana

Tres los díes dedicaos a los profesionales del sector, Fitur va abrir les sos puertes al públicu xeneral mientres la fin de selmana. Va ser nesi momentu cuando’l pabellón asturianu va ufiertar distintes actividaes d’animación, ente elles, una xunta de blogueros, un Trivial sobre’l Camín de Santiago n’Asturies, el xuegu Peregrinaje al Paraíso, basáu nel cascayu, y un photocall tematizaú sobre’l Camín de Santiago. Tamién s’entamen demostraciones d’escanciáu y degustaciones y talleres sobre la sidra natural y los quesos Cabrales y Casín.