Arantxa Nieto: «La mio debilidá ye un platu frixuelos»

Dióse a conocer na radio musical y fízose bien popular na televisión. Agora, ta embarcándose en nuevos proyectos y para un ratín pa Conocer Asturies cuntándonos les sos preferencies y recomendaciones
Arantxa Nieto

Diose a conocer na radio musical, en Los 40 Principales. Dende entós tien fecho periodismu en televisiones llocales y tuvo cuasi un llustru en TPA como presentadora del magacín de les tardes. Amás, ye una de les presentadores de gales y eventos más solicitada y xestiona’l blogue personal lentejuelasytachuelas.com, amás de collaborar n’otres iniciatives periodístiques. Agora ta embarcándose en nuevos proyectos y para un ratín pa Conocer Asturies cuntándonos les sos preferencies y recomendaciones…

Un llugar pa perdese… El Cantábricu que baña Asturies. Cualesquier de les nueses sableres, faros o cantiles son un bon llugar pa perdese y/o atopase.

Un llugar pa vivir… Tengo’l corazón dixebráu en trés… Nací en Mieres y tar na mio querida cuenca minera tráime más que bones alcordances… Al igual que Xixón que foi onde me crié. Agora vivo n’Uviéu y toi encantada. ¡Los trés llugares gústenme y enforma!

Un platu… Un quesín asturianu… y yo, yá soi feliz

Un postre… La mio debilidá ye y siempres va ser un platu de frixuelos.

Una sablera pa pasar el día… La sablera de Po. Pa min ye la meyor sablera del mundu y los mios meyores branos de la infancia tán venceyaos a ella.

La sablera de Po ye la meyor del mundu y los mios meyores branos de la infancia tán venceyaos a ella

Un pueblín que nun podemos dexar de ver… A min gústenme los pueblos mineros como Figareo. Creo que ye imprescindible nun escaecer la nuesa hestoria, que s’escribe con carbón.

Un chigre pa tomar unos culinos… Gústame entemecer tradición con modernidá. Mamaguaja en Xixón ye unu de los restoranes y chigres más chic d’Asturies y amás tien sidra. ¡Qué más se pue pidir!

Un parque natural pa visitar… El Parque Natural de las Fontes del Narcea, Degaña ya Ibias. En conretu’l Monte de Muniel.los. Conocílu va unos años y foi una esperiencia cuasi mística. Ye un espaciu más que máxicu.

Una fiesta a la que nun faltar… Les Piragües. ¡Siempres que puedo voi! Pa min son sinónimu de deporte, asturianía y folixa. Una amiestu de diez.

Un muséu pa recomendar… Gústenme enforma los museos. Creo que l’arte, la cultura ye esencial pal ser humanu. Agora mesmu quedaríame col Muséu de Belles Artes d’Asturies qu’hasta va unos díes brindónos la oportunidá de ver el retratu del monarca Fernando VII fechu por Francisco de Goya en 1814. ¡Un lluxu p’Asturies!

L’arte, la cultura ye esencial pal ser humanu

Un momentu de la hestoria… Encantaríame que llegara’l día de nun tener que lluchar pola igualdá. Que toos y toes sintiéramos el feminismu como daqué humano y natural.

Un baille pa pasalo bien… Cualesquier conciertu de rock y pop. ¡Tenemos tantos bonos grupos n’Asturies! Asina que, cualesquier sala que programe conciertos y apueste polos nuesos artistes.

Una pallabra n’asturianu que te preste… Güelita. Ye sinónimu d’amor infinitu y eternu.

Una tradición que nun pue perdese… Emocionase al cantar o escuchar en gaita’l nuesu Asturies Patria Querida.

Una espresión n’asturianu que te preste… Prestar. Esi verbu nuesu que puedes conxugar de mil maneres y pa él que nun esiste sinónimu en castellán nin n’otru idioma. Prestar ye muncho más que gustar… y muncho más prestoso que’l popular «In Love»… (rises)

Tags: