Anabel Santiago llega a Mundu Sidreru (TPA) pa falar de la rellación ente la Sidra d’Asturies y la música

La televisión pública asturiana (TPA) va emitir esti domingu un nuevu capítulu del so programa dedicáu a la Sidra d’Asturies. Mundu Sidreru, presentáu pol periodista Inaciu Galán, va tener a Anabel Santiago, cantante asturiana que revolucionó’l mundu de la tonada, como protagonista principal, nuna charra na que va falase de la so carrera y de la so rellación cola Sidra d’Asturies.

Nesti tercer capítulu de Mundu Sidreru, el programa percuerre’l llagar Vallina, en Xixón.

El chigre visitáu nesta ocasión ye Casa Mery, de Villaviciosa, onde Jose, chigreru y echador, va enseñanos como caltener la sidra na temperatura correcta.

El programa inclúi una receta fecha con Sidra d’Asturies pol cocineru Lluis Nel Estrada que nesti casu va consistir nun requeson a la sidra. Esti capítulu va averanos tamién a una pumarada onde falamos de les variedaes autóctones.

El programa emítese los domingos a les 21:30 hores y cuenta cola collaboración de la DOP Sidra d’Asturies