Asturies cunta con una cultura y unes tradiciones úniques, qu’acompañaes de gaites, sidra y ganes de pasalo bien faen que se xunten gran cantidá de fiestes d’interés turísticu. Estes son dalgunes d’elles:

Festival de la Sidra de Nava

La segunda fin de selmana de xunetu, dende 1969, les cais de Nava enllénense de conciertos, prebes de sidra y munches actividaes culturales que crean una folixa declarada d’interés turísticu nacional. El concursu a la meyor sidra, el premiu al echador del añu o los 5.000 llitros de sidra gratis que se reparten mientres esos díes son dalgunos de los motivos polos que nun puedes perder la cita esti branu.

Los Esconxuraos de Llanera

Llanera torna a la Edá Media la primer fin de selmana de xunetu de cada añu. Escudos, caballeros, bufones, guerreros… una recreación perfecta de la dómina na que puedes atopar dende puestos d’artesanía nos que mercar productos típicos de la dómina a representaciones teatrales o amueses de cetrería.

Unu de los actos más destacaos ye la gran cena celebrada’l sábadu. Más de 1.000 persones, vistíes coles sos meyores gales medievales, comparten mesa y esfruten de bufones, magos o homes de fueu mientres tastien un menú característicu de la dómina.

La mañana del domingu, tres la llarga nueche de celebración, represéntase na recintu ferial la procesión qu’en 1412 realizaron los vecinos de Llanera hasta Uviéu pa consiguir el perdón y esimise de la escomunión.

Fiestes del Carme de Cangas

Cada 16 de xunetu’l cielu de Cangas españa faciendo cimblar el suelu y los corazones de miles d’asturianos. La fiesta de La nuesa Señora del Carme, popularmente conocida como La Descarga, atrái cada añu a miles de turistes por ser referente pirotécnicu a nivel estatal.

Más de 80.000 voladores, qu’a la llegada de la Virxe del Carme a la ponte romana que crucia’l ríu Narcea, lláncense al cielu por 800 tiradores y apurridores, consiguiendo emocionar al ampliu públicu.

En 1902 fúndase l’asociación organizadora, pero esta tradición entama enforma tiempu atrás. Dalgunos dicen que ñació’l día nel que los franceses intentaron conquistar Cangas, otros, sicasí, ponen el so entamu nun festexu a la Virxe Marinera que trabayadores xixoneses entamaron na villa de Cangas.

Un día cargáu de tradición, emoción, pólvora… ¡y muncha folixa!

Descensu Folklóricu del Nalón

Más de 50 años lleva’l ríu Nalón, al so pasu pel conceyu de Llaviana, enllenándose de color y allegría los terceros sábados d’agostu. Decenes d’embarcaciones de creación propia baxen mientres un quilómetru y mediu pel ríu Nalón, dende Puente d’Arcu hasta La Ponte la Chalana, onde tolos participantes y asistentes canten a coru el cantar d’El Chalaneru.

Cada embarcación, diseñada y ellaborada polos miembros de cada peña, sigue una temática distinta y darréu son premiaes pola so rellación cola tradición o la cultural popular asturiana, l’animación, los antroxos de los tripulantes…

Una competición que ye reconocida a nivel estatal y na que nunca falta la folixa.