4 escritores pa conocer requexos d’Asturies 

Una forma guapa de conocer Asturies ye al traviés de los sos escritores. Nesti reportaxe ufrímoste cuatro llugares venceyaos con autores n’asturianu de tolos tiempos, pa que conozas dellos sitios especiales de la mano d’escritores ñacíos n’ellos.

El Cadavéu de Fernán Coronas

Nel conceyu de Valdés, a namás unos 18 quilómetros de la so cabeza, L.luarca, ta una parroquia bien guapa asitiada nuna rasa y a 90 metros d’altor sobre’l nivel de la mar. Siguiendo los pasos del Padre Galo, Fernán Coronas, pue visitase la so casa natal, convertida n’espaciu cultural y con una esposición sobre la so vida y la capiella de La Regalina, onde cada últimu domingu d’agostu se celebra una romería recuperada por esti clásicu de les Lletres Asturianes, con una danza prima multitudinaria y un pregón escritu na variedá del asturianu de la zona, conocíu como “faliel.la” de forma popular.

Llanes y Ribeseya pelos güeyos de Pin de Pría

Visitar l’oriente d’Asturies bien pue facese al traviés de la mirada de Pin de Pría. En Llanes, una de les parroquies de la redolada del conceyu tien munchu atractivu: Pría. Ta asitiada nel estremu noroccidental de Llanes, llendando con Ribeseya, y tien l’aquel especial de ser el pueblu natal d’un de los escritores más conocíos de la lliteratura asturiana de tolos tiempos, qu’amás llevó nel so nome a Pría, Xosé García Peláez “Pin de Pría”. Na so obra apaez el so conceyu y al traviés de los sos poemes podemos averanos a conocertamién el conceyu vecín, Ribeseya, onde s’atopa la “La Fonte del Cai”, que dio títulu a una de les obres más conocíes del autor. 

Carreño con Antón de Marirreguera 

Antón González Reguera, conocíu como Antón de Marirreguera, ye l’autor de la que se considera la primer obra lliteraria conservada n’asturianu, “Cuando examen les abeyes”, escrita en 1639 y considerada una de les sos meyores obres. Tamién escribió’l poema “Diálogu políticu”, les fábules “Dido y Eneas” y “Hero y Lleandro” y los entremeses “L’ensalmador”, “L’alcalde” y “Los alcaldes”. L’autor ñació nos primeros años del sieglu XVII en Llorgozana, una de les parroquies rurales de Carreño. Tres estudiar Llatín, Humanidaes y Teoloxía na Universidá d’Uviéu, ordénenlu sacerdote en 1631 y más tarde fíxose cargu de delles parroquies en Carreño, les de Priendes y Albandi, un par de bonos llugares p’arrancar el viaxe per Carreño. 

Xixón con María Teresa González

María Teresa González ñaz en Tremañes, en Xixón, en 1950. Esta escritora foi obrera na industria xixonesa CRADY hasta’l so pieslle en 1986, lluchando pol so puestu de trabayu en toa triba d’actos reivindicartivos. Foi xunto al so home Vicente García Oliva, una de les fundadores del grupu xixonés de Conceyu Bable en 1975. Dio a estampa dellos llibros de poesía y unu de rellatos, ganando tamién premios pola so obra lliteraria. E l parque dedicáu a la so alcordanza en Tremañes ye bon llugar pa entamar un percorríu diferente pel Xixón más industrial.

Tags: