in

4 coses que ver en Cuideiru

Mar, pesca y mil colores, asina podría describise Cuideiru, unu de los pueblos más característicos y reconocíos de la mariña asturiana.

Destaca ente la so redolada pol pixuatu, la variedá del asturianu del pueblu, tan querida pola so población y na que siguen falando nel so día a día y lleendo’l pregón llaicu na fiesta de L’Amuravela.

Ye tamién especial Cuideiru pola so disposición física, en forma d’anfiteatru escondíu dende’l mar y dende la tierra, por tradiciones como’l curadillu, un manxar únicu a base de tiburón, y polos cientos de colores de les sos cases. Ye por too ello Cuideiru un llugar de cuentu, declaráu bien d’interés cultural, que cada añu recibe miles de turistes que deseen almirar la so guapura.

La so nacencia remóntase a la Prehestoria. En Cuideiru topáronse cantares tallaos y diversos preseos que daten d’esta dómina, llugar que darréu nel Prerrománicu ocuparon los pésicos, pasando a convertise na Edá Media nunu de los principales puertos pesqueros d’Asturies, dende’l que partíen pescadores escontra Inglaterra, Flandes, Escocia o Portugal.

El faru, la capiella de l’Humilladeru, La Telaya son dalgunes de les xoyes d’esti pueblu qu’acompañaes de la deliciosa ufierta culinaria de los sos chigres van facer que pases una xornada bien prestosa.

CAPIELLA DE L’HUMILLADERU

Capilla del humilladero

Ye l’edificiu más vieyu de Cuideiru y unu de los más significativos. La so construcción remóntase al sieglu XIII, siendo paralela a la construcción de dalguna de les fases de la catedral d’Uviéu.

Los marineros allegaben demandando l’amparu a les sos flaqueces y desgracies. Nella tamién s’allugaben cuestiones de drechu y conducíase a los reos en viéspores de ser executaos.

Nunu de los remociques de la capiella, afayóse que la bóveda taba decorada con frescos qu’hasta entós tuvieren cubiertos por llucíos.

EL FARU

Faro de Cudillero/Cuideiru

Los sos oríxenes remóntense al añu 1883, siendo remocicáu col pasu del tiempu en numberoses ocasiones. Gocia d’un allugamientu únicu, onde pue esfrutase d’unes vistas magnífiques.

EL PUERTU

Un llugar pa pasiar y visitar dalgunu de los sos magníficos restoranes, onde vas poder probar la escelente cocina mariñana de Cuideiru.

PALACIU DE SELGAS

El palaciu de Selgas, conocíu como’l Versalles asturianu, ye una edificación indiana del sieglu XIX. Alluga un importante patrimoniu artísticu proveniente de toa Europa. Alredor de los edificios estiéndense xardinos inspiraos nes modes franceses ya ingleses de la dómina.

‘Intocables’ aporta al Teatru Xovellanos accesible pa tolos públicos

‘Intocables’ aporta al Teatru Xovellanos accesible pa tolos públicos

El FICX entama un ciclo de cine asturianu nel festival Cinespaña de Toulouse

Cine asturianu nel festival Cinespaña de Toulouse